చీకటి చూస్తోంది...

పగలంతా నిద్రించి
రాత్రయితే చాలు
కళ్ళు తెరుస్తోందీ చీకటి

మేల్కొన్నది ఊరకనే ఉండక
ఒళ్ళంతా కళ్ళు చేసుకుని
నన్నే ఎందుకు గమనిస్తోంది?

తన నక్షత్రనేత్రాల
రెప్పలను
మిణుకు మిణుకుమంటూ
వేసి ఆర్పుతూ
తదేకంగా నన్నెందుకు పరిశీలిస్తున్నట్లు?

ఎంత ప్రయత్నించినా,
ఈ మిన్ను మనసు
అర్ధం కాకున్నది.

అందుకనే...
ఈ నంగనాచి నింగి
దొంగ చూపులకు తట్టుకోలేకనే...
మిన్ను మేల్కొన్నాక
నిద్రించటం నేర్చుకున్నా!

నింగి నిద్రించింది లెమ్మంటూ
సూరీడు ఢంకా భజాయించి
దండోరా చాటిస్తే
మేల్కొంటున్నా!